come to my Fantastic World

Graphic post

Shermen-imagaination
Shermen-imagaination

ألا بذكر الله تطمئن القلوب

اللهم ارزقنا بألف القرآن أُلفة.. وبالباء بركة.. وبالتاء توبة.. وبالثاء ثوابا.. وبالجيم جمالا.. وبالحاء حكمة.. وبالخاء خُلة.. وبالدال دواء.. وبالذال ذكرا.. وبالراء رحمة.. وبالزاي زلفة.. وبالسين سناء.. وبالشين شفاء.. وبالصاد صدقا.. وبالضاد ضياء.. وبالعين علما.. وبالغين غنى.. وبالفاء فهما.. وبالقاف قوة.. وبالكاف كفاية.. وباللام لطفا.. وبالميم ملكا.. وبالنون نصرا.. وبالواو وقاية.. وبالهاء هداية.. وبالياء يقينا.. برحمتك يا أرحم الراحمين

Tuesday, April 24, 2007

الجواب المفحم

مرت امرأة فائقة الجمال برجل فقير بل معدم
فنظر إليها وقلبه ينفطر شغفا بجمالها، ثم تقدم منها ودار بينهما الحوار الآتي

الرجل: وزيّناها للناظرين
المرأة: وحفظناها من كل شيطان رجيم
الرجل: بل هي فتنة ولكن أكثرهم لا يعلمون
المرأة: واتقوا فتنة لا تصيبن الذين ظلموا منكم خاصة واعلموا أن الله شديد العقاب

الرجل: نريد أن نأكل منها وتطمئن قلوبنا
المرأة: لن تنالوا البرّ حتى تنفقوا مما تحبون


الرجل: وإن كان ذو عسرة
المرأة: حتى يغنيهم الله من فضله

الرجل: والذين لا يجدون ما ينفقون
المرأة: أولئك عنها مبعدون
عندها احمر وجه الرجل غيظا وقال
ألا لعنة الله على نساء الأرض أجمعين

فأجابته المرأة : للذكر مثل حظ الأنثيين

Wednesday, April 18, 2007

يا حلم عمري


البوست اللي فات كان بيتكلم عن رجل الأحلام بالنسبة للمرأة
البوست ده بقى بيتكلم عن فتاة الأحلام بالنسبة للرجل
خلينا مع الكلام ويارب يعجبكم
----------------------------------
يا حلم عمري
يسعدني أن تشعريني بأني أهم رجل في العالم بالنسبة لكي
شوقي أن أجد لديك في كل وقت دفئا وحنانا وتفهما
إيجابيتك وإقبالك على الحياة أكبر حافز لي
إبتسامتك وتفاؤلك أهم مصدر لتشجيعي
يلذ لي أن أراكي تعتمدين علي وأفرح في الوقت نفسه عندما تبهريني بتحمل المسئولية
أريدك طموحه وقنوعه
أحلمي معي ولكن لا تتركيني وحدي عندما ننزل إلى أرض الواقع
أغتنمي كل فرصة لتضحكي معي
تفنني في التعبير عن حبك لي وسعادتك معي
أهتمي بأناقتك ورشاقتك لأجلي
تفهمي آلامي وضغوط يومي وحرصي على أن أوفر لكي حياة كريمة
تذكري أنني لا أحب أن تقارنيني بأبيك أو أخيك أو بزوج صديقتك
يطرب قلبي أن تفتخري بي أمام كل الدنيا
لا تتوقعي مني - مهما إجتهدت - أن أنجح في أن أقرأ أفكارك في كل مره ساعديني بالتعبير بالكلمات الواضحه عن كل ما تقصدين أو تتمنين
أحفظي سري
أصغي إلي وشاركيني مشاعري وتفهمي صمتي
هناك أمور لا تعجبك في شخصيتي ساعديني بلطف على تغييرها دون أن تتقمصي ( دور أبلة الناظرة ) وتتحكمي مثلها
ثقتك في نفسك ثروتي ثقتي فيك تاجي
نعم أحبك وأهتم بكي لكني مستغرق الأن في أمر ما يشغل ذهني فتخيري توقيتا أفضل وبخاصة إذا كان ما تودين الحديث بشأنه يحتمل الإنتظار
وأخيرا أود أن تعلمي أنه مهما دارت الأيام وأمتدت السنون فلم أكن لأختار سواك وحدك لتشاركيني رحلة حياتي
لأنك أنتي نعم الحبيبة ونعم الرفيق

Tuesday, April 17, 2007

يا رجل أحلامي






البوست ده بيعبر إيه اللي عايزاه الفتاة من فتى أحلامها زوج المستقبل


البوست الجاي هقولكم ايه اللي عاوزه الرجل من فتاة أحلامه زوجة المستقبل


الكلام ده مش أنا اللي كتبته ده من مجلة


مش فاكرة إسمها


لكن الكلام اللي فيها قيم جدا



..................................................................................
يا رجل أحلامي



أريدك وسيما نعم أريدك وسيما في سلوكك وتعاملاتك



أريدك قويا تحتويني وتسندني وتدافع عني وتشعرني بالأمان



أريدك حبيبا يتأنى علي يرفق بي يغفر لي



أحتاج حنانك الذي يجفف دمعي ويهدئ نفسي



يسعدني أن تقدرني كإمرأة وتؤمن بدوري في الحياة وتشجعني على النجاح



يبهجني أن تحترم رأيي وتثق في ذكائي



وتحاول أن تنظر للأمور من وجهة نظري



سعادتي أن تكون صديقي وتجد متعة في الحديث معي



أبتكر في التعبير لي عن حبك كل يوم



أقبلني بعيوبي ونقاط ضعفي وساعدني على التغير نحو الأفضل دائما



قدني بهدوء إلى حيث تنمو شخصيتي



يسعدني أن تفخر بي أمام الناس



الرجولة في نظري قلب طيب وشعور بالمسئولية



أنا ككل إمرأة أعشق التفصيلات وأهتم بصغائر الأمور ولا أقصد أبدا إزعاجك



إحتملني أصبر علي كن لطيفا معي



إجعلني أشعر إنني الأجمل في عينيك دائما



شجعني على أن أتحدث إليك بمكنون نفسي دون أن أخشى غضبك أو أخاف رد فعلك



أحتضن كلماتي بأذنيك همساتي بعينيك عندما ألجأ إليك لمجرد الفضفضة التي تريح قلبي



أما سر سعادتي فسيظل دائما في جما إخلاصك لي وروعة إلتزامك نحوي



وأخيرا أود أن أعلنها وأمام كل الدنيا



أنك فرحتي وهدية السماء لي






Friday, April 13, 2007

لا تعليق


تورتة الزفاف
هو ده اللي هيحصل بعد كده
اصورة دي فكرتني بحكاية واحده صحبتي
فعلا كان ناقص إنها تشد حبيبها من ....... ذي الصورة كده
وتأخده على المأذون
جاتنا نيلة في حظنا الهباب

Sunday, April 8, 2007

ركز في الصلاة


استغفـر الله العظيـم

إستووا.. إعتدلوا.. إستقيموا يرحمكم الله
الله أكبر..

أحمد ركز بأه في الصلاة وبلاش تسرح، طيب


هو الراجل اللي جنبي ده صوابع رجليه عاملة كده ليه؟

صباعه الكبير ده كبير

آه بمناسبة الصوابع هي صوابع زينب دي اللي هيا إيه؟

بيتهيألي دي اللي عاملة زي الزلابية، زلابية؟؟ زلابية إيه بس وبتاع إيه



الله أكبر


أحمد ركز يا أحمد، طيب ماأنا مركز

مركز إيه طيب إنت قريت سورة إيه؟

أنا قريت سورة اللهب شفت بأه أنا مركز إزاي؟

لألأ دي كانت سورة الفيل


سمع الله لمن حمده

ربنا ولك الحمد، أنا

بس مش عارف أفطر إيه النهاردة؟

آه المطعم الجديد اللي كانوا بيتكلموا عنه

بيقولوا عليه أكله حلو، بس هو في شارع إيه؟


لما أخلّص الصلاة أتصل بالتليفون أعرف العنوان
الله أكبر

هيا الساعة كام دلوقتي؟

زمانها أربعة وخمسة، على فكرة هيا الساعة التانية الجلد كنت حطيتها فين؟

ياإما في الدرج ياإما في

دولاب ايه بس يا أحمد ركز ياأحمد إنت

أستغفر الله


الله اكبر

أهوه أنا مركز أهوه، إنظر لمكان السجود وركز في الأيات اللي بيقولها الإمام
الله أكبر

الشيطان ده أعوذ بالله بيخلي الواحد يسرح، مش هو الشيطان بيتسلسل في رمضان، يعني بيتسلسل تلاتين يوم، أيوه بس هو رمضان ده تسعة وعشرين ولا تلاتين؟ هو إبتدى إمتى؟ تعالى نحسبها هو كان يوم السبت في السعودية وفي مصر الأحد غريبة أوي الحكاية؟ طيب لو واحد على الحدود ورجل بره ورجل جوه يصوم ولامايصومش؟ شفت أهوه إنت رجعت تسرح تاني



الله أكبر

هو إحنا في الركعة الكام؟

يعني هانقوم ولا هانقرأ التشهد؟ لا دي التانية، طيب أقولك إتأخر شوية وشوف الي جنبك هايقوم يقف ولا يقعد يقرأ التشهد
الله أكبر

أيوه دي الركعة التانية، شفت بأه عشان سعادتك عمال تسرح، لأ خلاص أعوذ بالله من الشيطان الرجيم
الله أكبر

السجادة دي مريحة ولونها حلو، هيا سجادة ولا

لاموكيت بنسيج

آه على فكرة إبقى إفتكر تكنس السجادة اللي في البيت بالمكنسة

بس لازم أنضف كيس المكنسة عشان بقالي مده مانضفتوش
الله أكبر

الراجل اللي جنبي ده، رجليه بتزق في رجلي، طيب أحرك رجلي شوية، الله ده بيلزقها فيا


أستغفر الله
الله أكبر


فيه صوت موبايل، الناس دي ليه مش بتقفل الموبايل ساعة الصلاة مش عارفين ان ممكن ده يخلي الواحد مايركزش في الصلاة مع إن فيه يافطة محطوطة على الباب مكتوب عليها إغلق الجوال من فضلك وعليها صورة موبايل عليه علامة إكس.. بس هو الموبايل ده كان نوعه إيه؟ بيتهيألي سيمنس.. هيا إيه الرنة دي؟ آه أنا عايز أبقى أغير الرنة، فاكر الموضوع اللي كتبته عن رنات الموبايل


الله أكبر

الراجل اللي جنبي ده عمال يتحرك كتير، أستغفر الله مافيش خشوع خالص، أنا أهوه مش باتحرك
السلام عليكم ورحمة الله

السلام عليكم ورحمة الله

إيه هيا الصلاة خلصت ؟
السلام عليكم ورحمة الله
السلام عليكم ورحمة الله





أستغفر الله العظيم
لا اله الا الله الحليم الكريم

لا اله الا الله العلى العظيم

لا اله الا الله رب السماوات السبع ورب العرش العظيم

إلـــــــــــــــــهي لا تغضب علي فلست أقوى على غضبك

و لا تسخط علي فلست أقوم لسخطك

أطول رجل في العالم

بمناسبة أعياد الربيع إليكم هذا الخبر السريع
"باو تشيشون" 2.36متر وعروسة "تشيا"1.68متر

المدار العربي - قالت وسائل اعلام صينية
ان أطول رجل في العالم والذي بحث عن زوجة في ارجاء الارض انتهى به المطاف الى الزواج من امرأة في نصف عمره تقريبا من مسقط رأسه وذكرت صحيفة "بكين نيوز" أن باو تشيشون (56 عاما) وهو راعى ماشية طوله 36.2
متر والذي سجلته موسوعة جينيس للارقام القياسية العالمية كأطول رجل في العالم على قيد الحياة تزوج من بائعة صينية عمرها 29 عاما وذكرت الصحيفة بعد ان أرسل اعلانات للزواج في انحاء العالم وقيامه بعملية اختيار طويلة تكللت أخيرا جهوده بالنجاح وعروسه "تشيا" شوجوان طولها1.68 متر فقط من شيفنج في منغوليا الداخلية مسقط رأس باو
ووفقا لموسوعة جينيس فان باو وصل الي هذا الطول في طفرة نمو مفاجئة على مدى سبعة اعوام بدأت في مرحلة المراهقة ولم يتمكن الاطباء من تفسيرها حتى الان وبعد انتهاء خدمته في الجيش حيث جند في فريق لكرة السلة عاد الى منغوليا الداخلية حيث عمل في مجال الدعاية والاعلان الى جانب رعي الماشية وهي حرفته الاصلية

Saturday, April 7, 2007

tag

اسم مدونتك؟
فوضى الحواس
لماذا أخترته ..... ماذا تقصد به؟
هوه ف الأصل أسم رواية وعجبني الإسم أوي وحسيت أنه بيعبر عني
هل فكرت في إغلاق المدونة ..... والسبب؟
لا ماحصلش
صورتك ف المدونة، رمزيتها؟
ايوه رمزية وهيه صورة بنت رافعه إيديها اليمين وده دليل على إنها معترضة
طبيعة كتابتك في المدونة بشكل عام سياسة .... قصة ...... كلام فاضي
مدونتي فيها كل حاجه اللي بحس أنه بيأثر فيا سواء حاجه قرأتها وحسيتها أو مريت بيها بكتبها
لماذا تدون أصلاً؟
عندي وقت فراغ
أحلى جملة قيلت لك في وصف مدونتك؟
ناس كتير بتعلق على مدونتي وبيحسوا إنهم بيرتاحوا لما بيقرأوها الحمد لله
التعليقات بالنسبة أهميتها؟
بحس بتفاعل الناس معايا وده شيء بيسعدني وبيحفزني أكتب أكتر
أحلى بوست كتبته ضع اللينك ثم اذكر لماذا؟
أنا بعتبر إن كل البوسات اللي كتبتها في رأيي لكل بوست لوحده مذاق خاص وإحساس مختلف
أفضل مدونة قرأتها يمكن اختيار عدة مدونات؟
أفضل مدونة قرأتها وبتعجبني بضيفها عندي في قائمة مدونات صديقة
أفضل بوست قرأته يمكن اختيار أكثر من بوست؟
أفضل بوست أكيد موجود في أفضل مدونة اللي هما في مدونات صديقة
هل خسرت صديق بسبب كتابة هنا؟
الحمد لله لأ أنا بكسب أصدقاء جدد وده شيء بيسعدني
حد قل أدبه فى التعليق إيه رد فعلك؟
الحمد لله ما حصلش وإن حصل هلغي التعليق بتاعه وكأن شيئا لم يكن
أسوأ مدونة؟
أكيد أسوأ مدونة هيه اللي أفكارها مسممة أو هايفه وده طبعا بيبان مع أول نظرة على المدونة
أسوأ بوست؟
أسوأ بوست أكيد لأسوأ مدونة
أسوأ مدون؟
أسوأ مدون هوه أكيد اللي بيكتب في أسوأ مدونة

Thursday, April 5, 2007

مـــــــــــــــــــــــــــريم

كنت إمبارح في فرح واحده قريبتي وفي وسط الدوشه بتاعت الفرح وأغاني الدي جي اللي خرمتلي طبلة الأذن




لقيت نونو صغيرة بنوته ذي اللي ف الصورة دي بسم الله ماشاء الله جايه عليا وفاتحه إيدها ليا وكأنها جايه تحضني


بصراحه الموقف كان مفاجئ جدا ليا ولقيت نفسي بأخدها في حضني وبقولها تعالي يا حبيبتي ولقيتها بتبصلي وتبتسم بجد نستني الدنيا اللي حواليا وقعدتها على رجلي وقعدت أدلع فيها وبعدين مقدرتش أشيلها كتير كنت وأضطريت أقوم أقف جمب العروسه شويه عشان شكلي ما يبقاش وحش وأديت الطفله لماما لقيتها نامت كده على كتف ماما بس نايمه صاحيه أنتوا عارفين اللي في حاله سرحان وشرود كانت نظرتها حلوه أوي ذي الصوره دي

ورجعت قعدت تاني وأخدت الطفله من ماما وقعدتها على رجلي وفضلت ألاعبها لحد ما لقيتها فجأة نزلت من على رجلي بشكل غريب مش عارفه ايه اللي حصل

كانت جعانه وفي بنوته صغيره قاعده قريب مننا وبتأكل جلاش

والنونو اللي كانت معايا اللي عرفت بعدين إن اسمها مريم لقيتها واقفه جمب البنت دي وبتبصلها وبتبص للأكل فهمت إنها جعانه قلتلها انتي جعانه يا قمر طيب وقعدتها على رجلي وأكلتها من الجلاش بتاع البنت التانيه وفضلت أضحك طول الوقت على الموقف الظريف ده لحد ما ماتها جات تدور عليها مريم مريم إنتي فين قلتلها هيه إسمها مريم الله ربنا يخليهالك ويحميها بسم الله ماشاء الله عليها ومامتها قالتلي أصلها عشريه أوي قلتلها انا لقيتها جايلي لوحدها كده ومامتها بتأخدها عشان تروح جايه أبوسها لقيتها مخصماني وما رضيتش تبوسني قلت لمامتها شوفتي زعلت مني عشان أديتهالك بسرعه ومامتمسكتش بيها قالتلي آه المفروض كنتي تعزمي عليها بقلب جامد مش عزومة مراكبيه

وفضلنا نضحك انا ومامتها وبوستها وقولتلها باي يا مريم وضحكتلي ومامتها خدتها ومشيوا

وروحت البيت مبسوطه أوي إني شوفت مريم

تاج تالت

التاج ده من عند ريمو عباره عن سؤال واحد ورغم إني خلاص تعبت من التاجات لكن هرد عشان ماأزعلهاش
تكلم عن هواية لما بتمارسها بتستغرق فيها تماماً وتنفصل عن عالم الواقع لفترة من الوقت أثناء ممارستها؟؟؟؟؟؟
بالنسبة لموضوع الهوايات دي ف أنا عندي هوايات كتير جدااااااااااا من صغري أحب هوايه وأسيبها وأكتشف هوايه غيرها وهكذا
أول هواية أكتشفتها عندي كانت الغنا وكنت ف خمسه إبتدائي وكان صوتي حلو بس كنت بتكسف أوي لدرجه لما كان المدرسين يطلبوا حد يطلع يغني أدام الفصل كان كل صحباتي يرشحوني وأطلع وأتكسف أغني أقوم أدخل تاني بسرعه وكنت بشترك في حفلات المدرسه ومره كنت مشتركه في حفله بس أخترت دور الإستعراض كنا بنعمل حركات رياضيه عبيطه كده
وكنا خلاص عملنا البروفات بتاعت الحفله اللي هنقدمها وحفظت دوري وكل حاجه ويم الحفله تعبت جدا وما روحتش المدرسه وزعلت أوي كان نفسي أحضر الحفله ومن يومها وأنا اعتزلت الغنا والاستعراضات ( فنانه معتزله بقى يا جماعه ) ومحدش يتريق عليا إيه يعني كنت بتكسف
الهوايه التانيه بقى ودي كانت ف الإعداديه كانت الرسم ودي ماما أكتشفتها عندي وشجعتني عليها وكنت بحب أرسم أوي أوراق الشجر بحب الطبيعه أوي وفي مره كنت ف إمتحان أولى إعدادي وطلبوا مننا نرسم الغيطان والفلاحين وهما في حياتهم اليوميه
رسمت وطلع رسمي حلو أوي معرفش إذاي ويومها من غير ما المراقبين يأخدوا بالهم رفعت الرسمه بتاعتي لفوق وفرجتها لواحده جمبي أتبسطت أوي وقالتلي الله ساعتها فرحت بنفسي حسيت إني عملت حاجه
حتى لحد دلوقتي لما أجي أسرح كده بخيالي تلاقيني أرسم عيون حزينه وانا سرحانه و ورق شجر أحيانا
الموهبه التالته بعدها بسنتين نسيت الرسم ده خالص وبدأت أقرأ في كتب الشعر أحمد شوقي- إبراهيم ناجي- إيليا أبو ماضي وحسيت إني بحب الشعر قوي وبستمتع جدا وأنا بقرأه وبدأت أكتب حاجات عبيطه ف الأول وكنت بتكسف أوي حد يشوفها لدرجة إني قطعتها وحرقتها لأحسن حد يشوفها (هبل بقى ) والأكتر من كده فاكره موقف عمري ما هنساه أبدا مره كنت بحفظ قصيدة بس مش فاكره لمين
بس بتقول
مساء الخير ياأختي مساء الخير يا جاره
وقفت هنا على الشباك أستجديك منهاره
فهل ترضين أن تصغي بلا ضيق إلى ألمي
وترتاحين آونة من الأوراق والقلم
هيه بتاعت أمل دنقل أو فدوى
هيه بتحكي عن عصفورة وقفت تكلم الشاعر وتشتكي ليه وهيه واقفه على الشباك
القصيدة دي كانت صعبة وكان مطلوب حفظها وأنا كنت بحبها ومن كتر حبي ليها لقتني بلحنها وبغنيها وحفظتها صم
لدرجة إن المدرس أستغرب أنا الوحيده اللي كنت بسمعها من غير ما أغلط ولا غلطه وأصحابي بيغلطوا ويتلغبطوا فيها
وأنا كنت مبسوطه أوي بنفسي
وفضل معايا موضوع الشعر ده فتره طويله يمكن لغاية دلوقتي بحب أكتب الشعر جداااااااا بس أنا الوحيده اللي بتقرأه لأني بكتبه لنفسي وبحس إنها أسراري ومش بحب حد يطلع عليها غيري
آخر هوايه وصلتلها وهيه مش هوايه وبس الكمبيوتر والنت هيه كمان دراسه لأنها مجال تخصصي بس بحس إنها هوايه متجمدة وما فيهاش أي إحساس لكن مسلية ولذيذة

Monday, April 2, 2007

تاج تاني

التاجات عماله تنزل ذي المطره عليا
يلا إن شاء الله خير
التاج جالي بردوه من أحمد عيسى
هو بعتلي تاج اقول فيه عن 5 حاجات محدش يعرفها عني

أولا: مره ولعت ف البيت وأنا صغيره كان عمري وقتها سبع سنين لكن الحمد لله ربنا ستر الحكاية اني أخدت الكبريت من ورا ماما من غير ما هيه تعرف وطلعت على السطح وأختي كانت مستنياني فوق عشان نكمل باقي الخطه وولعت ف أول ورقة وأختي بقت تجبلي الورق لحد ما الموضوع كبر أوي وأنا وأختي خفنا ووافقنا مرعوبين والنار عماله تكبر وتكبر لحد ما الجيران بدأوا يأخدوا بالهم ان في دخان جاي من عندنا على السطح قالوا لماما طلعت تجري هيه والجيران ويطفوا الحريقة وأخدت يومها علقه سخنه لأني انا اللي سرقت الكبريت شريره انا مش كده ؟
ثانيا : كنت مسافره قريب القاهره وانا أصلا مش بسافر كتير(فيها حاجه دي ) فحجزت قطر مكيف أنا أصلا مش بركب القطر كتير فركبت القطر غلط وما ركبتش المكيف بتاعي أتقهرت أوي وسألت الناس مش ده المكيف طبعا ضحكوا عليا لكن نزلت ف نص الطريق وأستنيت المكيف وركبته لازم أخد حقي طبعا وصلت مرتاحه جدا وطبعا ما حكيتش لحد لما رجعت البيت أصل أنا كنت لوحدي ولما وصلت المحطه لقيت الناس بتنزل مش عارفه دي آخر محطه ولا لأ ومش عاوزه أسأل عشان محدش يضحك عليا قلت أنزل وأمري لله بالذات إن كل اللي ف القطر نزلوا لقيت خير اللهم أجعله خير طريق طويل ما أرتحتش غير لما لقيت يفطه كبيره مكتوب عليها القاهره قلت أكيد انا ف رمسيس ووصلت بسلامة الله ودي كانت أخر مره هسافر فيها لوحدي
ثالثا : كنت ف مره ف الكليه في يوم من أيام المشروع وكليتي الحمد لله في مكان مقطوع للي ميعرفهاش في طنطا وفي اليوم ده بالذات تقريبا المجموعة بتاعت المشروع أتفقوا على انهم يريحوا اليوم ده المهم وصلت الكليه ومالقيتش حد أتصلت بيهم هزئتهم ليه محدش عبرني وقالي أتاريهم نسيوني أصل عددنا كبير ف المشروع والمشروع كان كبير المهم قررت أروح والمكان فاضي ومفيش مواصلات ماإحنا ف أجازه بقى حطيت أيدي على خدي وقعدت على كنبه صغيره كده بس بقيت مرعوبة وبصراحه قلت لنفسي أذكري ربنا لعل وعسى ربنا يفك كربي سبحان الله والله ذي ما يكون ربنا بعتلي الأتوبيس وإيه أتوبيس خاص بإشتراك والسواق لما لاقني قاعده زعلانه كده قالي تعالي يابنتي أوصلك بيني وبينكم بردوه أنا خفت وأترعبت لكن أطمنت ان كان في طلبه راكبين ووصلني الحمد لله وبقيت بدعيله طول السكه ربنا يكرمه يارب في سري طبعا
رابعا : مره كنت راجعه من الدرس ف الثانويه العامه والدنيا كانت بتشتي وقبل بيتي بكام شارع كده رغم إن الناس كانت ماشيه ف الشارع عادي لكن انا حسيت إن في حد ماشي ورايا وأنا مرعوبه لدرجه اني خايفه أبص ورايا وفضلت أسرع الخطوات وأمشي بسرعه وحاسه بردوه إن في حد ماشي ورايا لحد ما وصلت البيت وأول ما وصلت بدأت أبص ورايا ما لقيتش حد مش عارفه كان وهم ولا حقيقه الله أعلم
خامسا : مره كنت راجعه من الكليه وبعدين عديت على محل مرايات ف الشارع وانا في طريقي للبيت وشوفت وشي في مرايا من المرايات دي بس مأخدتش بالي إن دي تبقى أنا وبعد ما عديت بقول لنفسي هوه انا شوفت البنت دي فين قبل كده وقعدت أفتكر لحد ما أخدت بالي ان ده محل مرايات وان اللي شوفتها دي هيه أنا وصلت البيت أضحك على نفسي
آه ياني كان لازم تدبسني ف التاج ده يا أحمد فكرتني بالذي مضى
الله يسامحك بقى
وأنا بدوري هدبس التاج ده لكل الناس
وعاوزه حد ما يردش
أما نشوف كده

تاج


التاج ده أنا جاوبته قبل كده وكان عندي مشكله هنا بس الحمد لله خلاص هقدر أنزله

س: اية اللي حيحصل لايميلك لما تموت ؟
يارب إجعل يومي قبل يوم إيميلي
ضل ايميل ولا ضل حيطه أهوه بيسليني على الأقل

س: اديت الباس وورد لحد قبل كده؟
لا أديته لحد قبل كده ولا بعد كده
س: لو اه كانت طبيعة علاقتك بيه اية؟
ماليش اي علاقة بحد يا باشا أنا تنظيم مغلق على نفسه
س : اسمك؟
شيرمن
س: اسم الدلع المشهور وسط اصحابك؟
شوشو
س:عمرك ؟
25
س : برجك؟
ليه الإحراج ده
أمتنع عن الإجابه لأن السؤال لا يفيد ف القضية
س : مجال دراستك؟
مهندسة كهرباء ومخي لاسع 240 فولت يعني إحذروا مني ممكن أكهرب أي حد في طريقي
س : شخصيتك نوعها ايه؟
هستيرية عصبية ممطرة صيفا متلجة شتاء يهب عليها الكثير من العواصف الرملية في الخريف تهدأ ف الربيع
شخصيه عاديه جداا
س : المود بتاعك؟
ايه الأسئلة دي مود مازيل من فضلك
س: وقت فراغك بتعمل فيه ايه؟
بقعد ف البيت أدام الكمبيوتر بتاعي وأنسى العالم اللي حواليا
س: الاكلة المفضلة؟
البيتزا
والمكرونة بالبشاميل
س:الصفات اللي اخدتها من بابا؟
الطول - الإبتسامة الحلوة - اللون الخمري - الحياة المنضبطة - الأكل بالشوكة والسكينة - التصرف بجنتله
س:الصفات اللي اخدتها من ماما؟
الحنية - الرومانسية - ا لحساسية ومحدش يضحك دي مش معناها الهرش
الطيبة بس دلوقتي بقيت أحيانا شريرة

س: اكتر6حاجات بتكرهها؟
الانتظار
الكذب
الخيانة
المجاملات
اللوع
البخل ودي أهم حاجه بكرهها

س:اكتر 6 حاجات بتحبها؟
الصلاة
قراءة القرآن
أهلي
الجلوس أمام الكمبيوتر ساعات طويلة
النوم بعشقه عشق
البيتزا

س:الشغل بالنسبة لك ايه؟
ولا حاجه لأني مش بشتغل
س: السفر؟
بعشق السفر لكن بخاف منه
س: هل لديك اقوال اخري؟
لا يا أفندم شكرا
لكن بمرر التاج ده لجرووم بالذات

Sunday, April 1, 2007

الإستفتائيون يمتنعون

كل أما أدخل بلوج ألاقي الناس كاتبه عن التعديلات الدستورية والإستفتاء
مش عارفه هنستفيد إيه لما نعارض مش معنى كده إن عندي سلبيه
كل اللي ف الموضوع إن الحكايه مش مستاهله رفضنا وافقنا مش فارقه
يبقى الحل ايه ؟؟؟؟؟؟
الحل بسيط أوي ندعيلهم
ربنا يخليهم ويأخدنا
إنا لله وإنا إليه راجعون
وعلى رأي الأغنية الشعبية
للمطرب الشعبي
ألدو شاهين
شالوا ألدو حطوا شاهين
ألدو قال مأنتوش لاعبين
ولا عزاء للإستفتاء


Powered By Blogger