تابع التعود

البوست السابق أنا عرفت فيه يعني ايه الرابط النفسي أو ذي ما ياسر حسين قال إن اسمه الإرتباط الشرطي

قانون الارتباط الشرطي وهو باختصار يعنى أنه كلما ارتبط شيء معين بمشاعر أو أحداث سارة فإننا نحب هذا الشيء والعكس صحيح

و انتبهوا كويس لكلمة أرتبط يعني مايجيش حد يقولي مثلا أنا لما بشرب الشاي مش بسهر ولا حاجه ذي ما في ناس بتقول انه بيأثر عليهم وبيناموا أهو المثال ده لنوعين متناقضين من الناس

إذاي يعني أقولك اذاي

يعني لو انت من النوع اللي بيشرب الشاي ومش بيأثر عليه وعادي جدا ممكن ينام فده معناه ان الحدث ده انت مش مرتبط بيه مش بيشد انتباهك لا يمثل عامل جذب بالنسبة ليك

أما لو انت من النوع اللي الشاي بيأثر عليه جدااا وبيسهره أوي يبقى حصلك ارتباط شرطي أو رابط نفسي بالموضوع ده

هقولك على مثال حصلي شخصيا

وأنا صغيرة حوالي 12 سنه كده كنت أسمع ان القهوة بتسهر جدااااا ومره من ضمن المرات شربت فنجان قهوة وأنا من النوع اللي كنت متعودة أنام بدري يعني بعد العشا كده ولما شربت القهوة ماعرفتش أنام خالص وسهرت لحد الساعه 3 الفجر(من 9 مساءا إلى 3 صباحا) حد يقولي فين الارتباط الشرطي اللي حصل هنا ده انتي أول مرة تشربيها

هقولك بس أنا سمعت عنها انها بتسهر ده غير نسبة الكافيين اللي موجوده فيها يعني لو نسبة الكفايين اللي فيها بتسهر بنسبة خمس ساعات يبقى الثلاث ساعات اللي سهرتهم زيادة بسبب الرابط النفسي اللي حصلي لما سمعت كتير عن القهوة وحبيت أجربها

ده بالظبط اللي بيحص لنا لمجرد سماع معلومة أثرت فينا أو جربناها بنفسنا لمدة طويلة وأتعودنا عليها

آه رجعنا تاني لمصطلح التعود

نبدأ نتكلم في النقطة الثانية للموضوع

اللي هيه بتعرفنا اذاي نستفيد من موضوع الرابط النفسي ونستغله لصالحنا

ونستغله في تغيير سلوكنا وعوايدنا اللي اتعودنا عليها

شوفوا المثال ده

عالم من علماء النفس عمل تجربة على طفل ودخل عليه في غرفة نومه فار من فيران التجارب اللي ممكن تلاقي ناس في أوروبا بتربيها

المهم العالم خلى الطفل فى حجرته ودخل عليه الفارالطفل عادى بيلعب مع الفار بعد فتره كل ما يدخل الفار يعمل اصوات مرعبه وازعاج لحد ما الطفل اترعب من الفارلان الرعب عنده ارتبط بالفار فكل ما الفار يدخل حتى بدون اصوات الطفل يبكى المهم العالم بقى كل ما يدخل الفاريشغل موسيقى ويحط للطفل حلويات وما الى ذلك فتبدلت مشاعر الطفل تجاه الفار

وعلى رأي أحمد طاهر غير معتقداتك تغير سلوكك

كل الكلام اللي فوق ده ممكن يكون متكرر وكلنا قرأناه قبل كده

لكن الجديد ف الموضوع هو بعض الأمثلة الواقعية اللي ممكن تفيد البعض فينا واللي يمكن أكون جربت كتير منها

وعلى رأي تامر نبيل اسمه الروتين القاتل لأنه بيقتل الإبداع

لو أنت حياتك مملة وبتمارس نفس الطقوس يوميا ممكن تضيف لها جديد أو تغير ترتيبها

هتقولي اذاي يعني

شوف يا سيدي

طبعا محدش يقدر يجي جمب الطقوس الدينية ذي الصلاة والصوم محدش يفهمني غلط وحبيت أوضح ده عشان خاطر ساهر نبهني لكده جزاك الله خيرا يا ساهر

الطقوس دي أنا هستغلها في ترفيه حياتنا العادية

ناس هتقولي يووووووووه هتقولنا لو زهقان أقرأ قرآن أقفل ياعم البلوج ده هتعملنا ذي الشيوخ

أسمعوني

والله هنستغل حاجات كتير من داخل الحياة في رفاهية الحياة بدون مانصرف أو نكلف عشان خاطر نستمتع

يعني اللي مش متاح ليه انه يسافر عشان يغير جو مثلا مش لازم بسبب الفلوس ممكن يكون لأسباب أخرى

ممكن أوي يغير جو ويغير روتينه اليومي وهو في نفس المكان

خليك معايا في السيناريو ده

صحيت من النوم عود نفسك يوميا أول ما تفتح عينك تقول

اللهم بك أصبحنا وبك أمسينا وبك نحيا وبك نموت وإليك النشور

وإبتسم لو مش قادر تبتسم أجبر نفسك على الإبتسام

أقف أدام المرايه وحاول تضحك

آه شايفه واحد بيقول لصاحبه ياعم دي باين عليها مجنونه

وعاوزانا نقف أدام المراية ونقول أنا مش قصير أذعى أنا طويل وأهبل الجملة المشهورة للفنان الراحل عبد المنعم مدبولي

والله أبدا أنا مش مجنونه

خليك معايا للآخر

أسمعني بس مش هتندم

انت تعرف إن تبسمك في وجه أخيك صدقة

مابالك لو أنت مش قادر تبتسم أول ما تقوم من النوم طبعا كل أما تقابل حد مش هتبتسم وهتضيع من إيدك فرصة جميلة تأخد منها ثواب

ولو حد قابلك وإبتسم في وجهك هتلاقي نفسك تلقائي إبتسمت له وياسلام بقى لو اللي قابلك ده كان بيبتسم لك من قلبه

هتلاقي نفسك تلقائي وشك فك الجمود اللي هو فيه

عشان كده بقولك لو مش قادر تبتسم أقف ادام المرايه وإبتسم لنفسك

عشان تقابل الناس بوجه بشوش وتضيف لهم السعاده وبالتالي هتلاقي نفسك سعيد

خلاص صحيت من النوم وقلت الدعاء وإبتسمت

الحمد لله

وإن شكرتم لأذيدنكم ..... صدق الله العظيم

وعلى رأي عادل إحنا أتعودنا على نعم ربنا علينا لدرجة إن إحنا نسينا نشكر خالق النعم دي

وطبعا مهما شكرناه وحمدناه مش هنقدر نوفيه حق نعمه الكتيره علينا

إحمد ربنا على نعمه عليك كل يوم الصبح

واحد هيقولي ده انتي يومك طويل أوي أنا زهقت ده احنا لسه ف أول اليوم والدنيا حر

لو عاوز تكمل كمل مش عاوز بردوه أنصحك تكمل معايا

طبعا لازم ندخل نتوضى ونصلي الفجر دي أجمل حاجه ف اليوم كله صلاة الفجر

يلا يا عم الموضوع قلب ديني

أستنى بس ماهو ديني على دنيوي

احنا لسه بنقول يا هادي

بعد الصلاة أعمل لنفسك ورد من القرآن أقرأه كل يوم بعد صلاة الفجر إن شاالله يكون صفحة واحده من المصحف

وبعدها أقرأ أذكار الصباح لو مش حافظهم

وعلى فكره لو أتعودت على قرائتهم أسبوع واحد يوميا هتلاقي نفسك حفظتهم وبترددهم كل يوم

خلصنا جزء صغير أوي من اليوم

أبدأ يومك العادي بكل نشاط

وضب لنفسك الفطار جهزه لنفسك ولأهلك لو حد منهم مستيقظ يصلي الفجر وسنه كبير شويه

ولو اللي صاحيين معاك شباب خليهم يوضبوا معاك الفطار

أد إيه هتحس إنك سعيد جدا وأنت بتستنشق أولى نسمات الصباح وأنت صاحي من الفجر وبعد الصلاة لما الصبح يشقشق

منظر طبيعي خلاب ورائع واللي يفوتوه المنظر ده يبقى فاته نص عمره مش بقول كلام ده بجد

وإحسبها كده لو من هواة الصحيان متأخر من النوم هتلاقي إنك بتضيع على نفسك نص عمرك فعلا

أجمل حاجه بعد كل اللي حصل ده انك تلعب شوية رياضه ثني مد جري ف المكان رياضة بسيطه تنشطك وتنشط الدورة الدمويه عندك

جرب وقولي النتيجة هتلاقي نفسك باقي اليوم نشيط جدااا وإنه أحسن يوم عدى عليك من يوم ما أتولدت

لو سنك فوق الأربعين وماجربتش تلعب رياضه ما أنصحكش تزود العيار لأن الموضوع هيبقى متعب يعني ألعب رياضه على خفيف أوي

خد شاور حلو كده وظبط نفسك

على فكرة الإستحمام صباحا ومساء مفيد جدا

صباحا بينشطك ليوم كله حيويه ونشاط

مساءا حمام دافي كفيل إنه ينيمك ذي الملائكة بدون اي مجهود عصبي أو عضلي عشان تعرف تنام

أخدت الشاور

حمام العافيه

ألبس هدوم الخروج وروح شغلك وكلك حيويه ونشاط

وأنت هتدعيلي باقي اليوم

اخ في ناس مش بتشتغل ذيي كده

يعملوا ايه باقي اليوم

حد بقى يقولي لأن دي الحاجه اللي محيراني

مش عارفه اعمل ايه باقي اليوم

زهقت من الخروج

زهقت من تنضيف البيت

زهقت من الطبيخ

زهقت من الرغي ف التليفون

زهقت من الفرجه على التليفزيون

حفظت الأفلام

ساعدوني لوجه الله

يقدعلكم في عينكم وف عافيتكم قادر يا كريم على رأي اللمبي في 55 إسعاف

أما بقى عن سؤال الفرق بين التعود والإدمان اللي سألته داليا

شوفي يا قمر

فيه فرق طبعا بين التعود والإدمان

التعود : هو سلوك معين بنعمله كل يوم أتعودنا عليه ونقدر نستغنى عنه في أي وقت

الإدمان: سلوك بردوه أتعودنا عليه لكن عشان نبطله محتاجين إراده حديديه لأننا بنكون أدمننا تواجده في حياتنا بشكل مرضي مش بشكل طبيعي يعني لو أتعودنا نشرب شاي كل يوم لمدة خمس سنين متصلة ومافوتناش يوم واحد

ولو يوم عدى من غير ما نشرب شاي مثلا لقينا نفسنا أتأثرنا نفسيا ذي إصابة بشويه صداع أو عدم تركيز ف اليوم أو إحساس بالضيق يبقى إحنا أخدنا الشكل المرضي للسلوك

أما لو تطرقنا للجزئية دي من وجهة نظر المخدرات وتأثيرها علينا و إدمانا ليها

فدي في رأيي مش بعتبرها إدمان بالمعنى اللغوي أد ماهي تأثير على الجهاز العصبي المركزي وتوقيفه بشكل مباشر عن أداء مهامه الوظيفيه اللي ربنا سبحانه وتعالى خلقها له وهي انه يفرز مادة اللأدرنالين

اللي كلنا عارفين إنها بتفرز من المخ وقت حدوث ضغط ما أو إنفعال ما أتعرض له الإنسان

ولما المخدرات بتوقف الجهاز العصبي المركزي عن أداء وظائفه بيختل النظام اللي خلقه ربنا عز وجل

تمت بحمد الله