شوف يا راجل
أنت ايه أو هوه ايه ؟
كل واحد فيكو راجل
كل واحد فيكو اسمه
اي اسم بردوه راجل
ف البطاقة خانه فاضيه
ايوه فاضيه
أتملت بالكلمة عافية
مش دليل الكلمه يعني
انك انت تملا عيني
اني أسلملك سنيني
وأحلف اني عايشه فعلا
حد قدي؟
ف ضل راجل
=======
شوف هيتنرفز عليا
طيب أفهم ... وإعقل انت
وانت فسر لي القضية
لما أسهل حاجه عندك
تبقى دايما هيه جرحي
لما تستخسر ف قلبي
كلمة حلوة ...
بيها تتشكل ملامحي
بيها أوهبلك حياتي
تبقى كل شيء ف عمري
اللي عدى واللي فاضل
ولا فاكر الكلام ده عيب تقوله
وانت راجل
========
طيب بلاش دي :
لما تلعب بالمشاعر
مره بالغنوة الجريئة
ومره تعمل فيها شاعر
وأما أصدق
وأنت تبقى ف عيني أصدق
نبتدي المشوار وأشوفوه
بين ايديا خلاص هيكمل
وتدي كل اللي بنيته لواحده تانيه
طب وانا والحلم الأخضر ؟
كل ده هيروح ف ثانية ...؟
تبتسم وتقولي شوفي
انتي قلبك كان مناضل
بس قلبي حب غيرك
يبقى حقي
وانتي بكره يجيكي راجل
واما تعمل فيها انك
شهريار فارس زمانك
واحده ع الشات بتقابلها
وواحده ع المحمول وواحده ....
اخت صاحب من جيرانك
وانت فرحان بالرجوله
والاسامي لما تكتر
هيه دي تبقى البطوله
لأ وأختك تبقى عبده
وأمك المسكينه تتعب
من زعقيك والمناهده
وأما حد يجي جمبك
اللسان يطول وتعلن
ان جوه البيت ده راجل
==========
شوف ياراجل
قبل ما تبرق وتحلف
اني مجنونه بجنابك
واني مش طيقاك حقيقي
بس دايما محتاجلك
لأ
مش محتاجه بدلة وجرافته
وصوت جهوري يجيب زغطه
قلتلك يا سيدنا أفهم
أصلي مش هقدر أجامل
محتاجلك لما تبقى
ف الكلام والفعل راجل
مستحيل هفضل لوحدي
مستحيل ما أقبلش انك تبقى أخويه
اللي يستر هوه ضهري
اللي ياخد هوه ايدي
مستحيل ما اقبلش انك
تبقى لما ألاقك حبيبي
تبقى ضلاية لهيبي
وأبقى حوا
اللي ما بتنكرش عنك
انها كانت حته منك
بس لما كنت راجل
No comments:
Post a Comment