حبيبتي من ضفايرها طل القمر و بين شفايفها ندى الورد بان
ضحكتها بتهز الشجر و الحجر و حنانها بيصحّي الحياة في النبات
حبيبتي بتعلّمني أحب الحياة من حبي فيها حياتي شمس و ربيع
حبيبتي بتعلّمني أحب الحياة من حبي فيها حياتي شمس و ربيع
و الحب في الدنيا دي طوق النجاة لولاه يضيع قلب المحب الوديع
يا حلوة يا بلدنا يا نيل سلسبيل بحبك انتِ رفعنا راسنا لفوق
يا حلوة يا بلدنا يا نيل سلسبيل بحبك انتِ رفعنا راسنا لفوق
لو الزمن ليّل ما يرهبنا ليل شوقنا في عروقنا يصحّي شمس الشروق
الحلوة قلب كبير يضم الولاد و زاد و زوادة و ضِلة و سبيل
الحلوة قلب كبير يضم الولاد و زاد و زوادة و ضِلة و سبيل
الموت و الاستشهاد عشانها ميلاد و كلنا عشّاق ترابها النبيل
============================
ملعون في كل كتاب يا عار الخيانة
اللعنة و النار ع اللي خانوا الأمانة
عاشوا على موتنا .. و موتهم حيانا
عليهم اللعنة في ترابنا و سمانا
إتردي يا ابواب البيوت .. و ابعديهم
و إتسدي يا ابواب القلوب .. و اطرديهم
و اتفتحي يا ابواب الجحيم .. و اورديهم
جزاة ما خانونا و باعونا لعدانا
ما تطلعيش يا شمس ع اللي يخونّا
و ما تنطفيش يا نار قلوبنا و عيونّا
و ما ترحميش اللي احنا على قلبه هنّا
و اكوي بنارنا كل نقطة في دمانا
============================
أغنيتي فيلم كتيبة الإعدام
كلمات: سيد حجاب
ألحان: عمار الشريعي
غناء: فرقة الأصدقاء
============================
بصراحه الفيلم ده من أروع الأفلام اللي قدمتها السنيما المصرية وطبعا إخراج متميز جدا للمخرج الراحل عاطف الطيب أنا من كتر حبي للفيلم ده كل أما يجي أقعد أتفرج عليه وبالصدفه وأنا بعمل بحث ع النت عن أغاني قديمة لأني بعشق الأغاني القديمه بس مش كلها وقع تحت أيدي مدونه فيها الأغنييتين دول ومكتوب كلماتهم مع الإعتذار للأخت صاحبة المدونه أنا حبيت أنشرهم هنا لأني معجبه بيهم أوي ده غير كلمات الأغاني الرائعه جدا
أتمنى يعجبوكم
No comments:
Post a Comment